ചെറുതോണി : വാത്തിക്കുടി കൊന്നത്തടി നെടുങ്കണ്ടം പഞ്ചായത്തുകളെ തമ്മിൽ ബന്ധിപ്പിക്കുന്ന ബഥേൽ കുരിശടി പാലം തകർന്നിട്ട് ഒരു വർഷത്തോളം പിന്നിടുമ്പോഴും പുനസ്ഥാപിക്കാൻ നടപടിയില്ലന്ന് പരാതി. വൈദ്യുതി വകുപ്പ് കല്ലാർ ഡൈവേർഷൻ ഡാം അപ്രതീക്ഷിതമായി തുറന്നുവിട്ടതാണ് പാലവും പാലത്തിലേക്കുള്ള ഇരുവശത്തേ റോഡുകളും തകരാൻ ഇടയായത്. രണ്ടായിരത്തിലധികം കുടുംബങ്ങൾ ഉപയോഗിക്കുന്ന പാലം വീണ്ടും നിർമ്മിക്കാനായി നാട്ടുകാർ അന്ന് നിരവധി തവണ ജനപ്രതിനിധികളെ സമീപിച്ചെങ്കിലും നടപടിയുണ്ടായില്ല. ഇടുക്കി  ഉടുമ്പൻചോല നിയോജകമണ്ഡലങ്ങളുടെ അതിർത്തി പങ്കിടുന്ന ചിന്നാർ പുഴയ്ക്ക് കുറുകയുള്ള പാലമാണ് കഴിഞ്ഞ നവംബറിൽ തകർന്നത്. വൈദ്യുതി വകുപ്പ് മുൻപും പലതവണ മുന്നറിയിപ്പില്ലാതെ കല്ലാർ ഡൈവേർഷൻ ഡാം തുറന്നുവിട്ട് വലിയ നാശനഷ്ടങ്ങൾ സൃഷ്ടിച്ചിട്ടുണ്ട്. ചിന്നാർ പുഴയിലെ കുത്തൊഴുക്കിപെട്ട് ബഥേൽകുരിശടി പാലവും  ഇരുവശത്തെ റോഡുകളും തകർന്നു പോയി. മൂന്നു പഞ്ചായത്തുകളുടെ അതിർത്തിയിലുള്ള നിരവധി കുടംബങ്ങൾ യാത്രാ ദുരിതം  ചൂണ്ടിക്കാട്ടി അധികൃതർക്ക് നിരവധി നിവേദനങ്ങളും നൽകിയിരുന്നു. വിദ്യാർത്ഥികൾ ഉൾപ്പെടെയുള്ള നാട്ടുകാർ ഇപ്പോൾ അറ് കിലോമീറ്ററിലധികം യാത്ര ചെയ്ത് പെരിഞ്ചാകുട്ടി ചെമ്പകപ്പാറ ഭാഗങ്ങളിലൂടെയാണ് മറുകര കടക്കുന്നത്. എന്നാൽ ബന്ധപ്പെട്ട അധികൃതർ ബോധപൂർവ്വമായ  നിസംഗത പുലർത്തുന്നുവെന്നാണ് നാട്ടുകാരുടെ പ്രധാന ആരോപണം. പുതുതായി ചുമതലയേറ്റ ജനപ്രതിനിധികളെങ്കിലും അടിയന്തരമായി ഇടപെട്ട് പാലം നിർമ്മിച്ച് പ്രതിസന്ധി പരിഹരിക്കുമെന്നാണ് പ്രദേശ വാസികളുടെ പ്രതീക്ഷ